Il-Ħajt ta' Berlin
Il-Ħajt ta' Berlin
Ingħaqad mal-passat u skopri żewġ segmenti oriġinali tal-Ħajt ta' Berlin matul iż-żjara tiegħek fil-Parlament Ewropew fi Brussell.
Il-Ħajt ta' Berlin
Il-waqgħa tal-Ħajt ta' Berlin kien mument emblematiku fl-istorja Ewropea, li mmarka t-tmiem ta' era ta' diviżjoni tal-kontinent. Il-Ħajt ta' Berlin qasam il-Ġermanja u l-Ewropa mill-1961 sal-1989. Wara l-waqgħa tiegħu matul il-lejl tad-9 ta' Novembru 1989, segmenti mill-ħajt ġew installati f'diversi partijiet tad-dinja, li jissimbolizzaw l-importanza tal-għaqda fuq id-diviżjoni.
L-istorja taż-żewġ segmenti oriġinali tal-Ħajt ta' Berlin
Żewġ partijiet mill-Ħajt ta' Berlin jinstabu ħdejn id-daħla tal-viżitaturi għall-Emiċiklu.
Wieħed minn dawn is-segmenti oriġinali tal-Ħajt ta' Berlin ingħata mill-belt ta' Berlin lill-belt kapitali Ewropea bħala ġest simboliku li jikkommemora r-riunifikazzjoni Ewropea. Wara li tneħħa mill-post oriġinali tiegħu fil-Potsdamer Platz f'Berlin, ġie ppreżentat lill-pubbliku ta' Brussell f'Leopold Park fit-22 ta' April 2004, il-ġurnata ta' qabel l-adeżjoni ta' għaxar pajjiżi ġodda biex jissieħbu fl-Unjoni Ewropea.
It-tieni segment oriġinali tal-Ħajt ta' Berlin kien parti minn wirja organizzata fi Place du Luxembourg biex tikkommemora l-20 anniversarju mill-waqgħa tal-ħajt f'Novembru 2009. Wara l-wirja, din il-biċċa ġiet akkwistata mill-Istat Belġjan, filwaqt li biċċa oħra mill-wirja ġiet akkwistata mill-Kummissjoni Ewropea u issa hija esibita barra s-sede tagħha, fil-bini Berlaymont.
Iż-żewġ biċċiet, l-ewwel waħda mogħtija bħala donazzjoni mill-belt ta' Berlin u t-tieni waħda li waslet Brussell għall-wirja, ġew rilokati fil-post attwali tagħhom fl-2021 bħala parti minn proġett biex ikunu protetti - proġett organizzat b'mod konġunt mill-Istat Belġjan, ir-Reġjun Kapitali ta' Brussell u l-Parlament Ewropew.
Il-porzjonijiet tal-ħajt, li issa huma simboli tal-impenn għall-paċi, il-libertà u d-demokrazija, huma miksija bi graffiti u skrizzjonijiet.
L-istorja tal-Ħajt ta' Berlin
Il-Ħajt ta' Berlin kien ostaklu fiżiku u ideoloġiku li qasam il-Lvant u l-Punent ta' Berlin għal 28 sena. Mibni mill-gvern tal-Ġermanja tal-Lvant, il-ħajt waqqaf liċ-ċittadini milli jaħarbu lejn il-Ġermanja tal-Punent. Il-waqgħa tiegħu mal-lejl tad-9 ta' Novembru 1989 wasslet għar-riunifikazzjoni tal-Ġermanja tal-Lvant u tal-Punent, li seħħet sena wara. Fi żmien sentejn, kull reġim Komunista fl-Ewropa kien waqa', u dan witta t-triq għal numru ta' pajjiżi biex jissieħbu fl-Unjoni Ewropea fl-1995, l-2004, l-2007 u l-2013.
Berlin wall
Kif tasal hemm
Għall-Parlament Ewropew, ieqaf fl-istazzjon Bruxelles-Luxembourg.
