Il-Parlament Ewropew fi Strażburgu
The panoramic terrace of the WEISS building will be open to visitors (depending on weather conditions and number of visitors). The terrace offers an impressive view of the European quarter, the city of Strasbourg and its surroundings.
Il-Parlament Ewropew fi Strażburgu hu miftuħ għall-viżitaturi sitt ijiem fil-ġimgħa matul is-sena kollha. Iż-żjarat huma dejjem bla ħlas.
Waqt iż-żjara tiegħek, tista' tara l-kamra parlamentari Ewropea, jiġifieri l-Emiċiklu, il-Parlamentarium Simone Veil u diversi wirjiet.
Fi Strażburgu, il-Membri tal-Parlament Ewropew jiltaqgħu tnax-il darba fis-sena, waqt is-sessjonijiet plenarji, biex jiddibattu u jivvotaw dwar il-liġijiet Ewropej. Bħala viżitatur, tista' tattendi s-sessjoni biex, mill-gallerija tal-viżitaturi, tara u tisma' lir-rappreżentanti tiegħek jitkellmu. Agħti ħarsa lejn il-kalendarju tas-sessjonijiet plenarji.
Sib l-informazzjoni prattika hawn taħt, skont meta beħsiebek tiġi żżurna.
Żur il-Parlament Ewropew fi Strażburgu s-sessjoni plenarja
Skopri s-sede uffiċjali tal-Parlament Ewropew fi Strażburgu. Ittawwal fuq ġewwa tal-binja ikonika fejn id-demokrazija Ewropea tieħu l-ħajja. Agħmel iż-żjara tiegħek bi gwida multimedjali disponibbli bl-24 lingwa uffiċjali tal-Unjoni Ewropea, jew ibbukkja żjara bi gwida bil-Franċiż, bil-Ġermaniż jew bl-Ingliż għall-grupp tiegħek.
Żur il-Parlament Ewropew fi Strażburgu matul is-sessjoni plenarja
Aħtaf l-opportunità li tara d-demokrazija Ewropea fl-azzjoni matul sessjoni plenarja. Żjara tal-Parlament Ewropew fi Strażburgu matul is-sessjonijiet plenarji hija mod eċċezzjonali ta' kif tidħol fl-atmosfera tal-akbar parlament tranżnazzjonali tad-dinja u l-unika istituzzjoni tal-UE li hija eletta direttament.
L-avvenimenti u l-wirjiet
Minbarra ż-żjara tal-Emiċiklu, li hi żjara li mhux ta' min jitlifha, waqt iż-żjara tiegħek tista' tesplora wirjiet permanenti u temporanji, jew tieħu sehem f'wieħed mill-ħafna avvenimenti li jseħħu fil-Parlament Ewropew matul is-sena kollha.
L-aċċessibbiltà
Il-Parlament Ewropew huwa impenjat li jtejjeb kostantement l-aċċess għall-persuni b'diżabilità. Jekk inti jew xi ħadd mill-grupp tiegħek għandkom bżonn assistenza speċjali, jekk jogħġbok avża lis-servizz tal-viżitaturi minn qabel:
Sigurtà
Is-sigurtà u s-sikurezza huma prijoritajiet għall-Parlament Ewropew. Għal dik ir-raġuni, hemm fis-seħħ għadd ta’ miżuri ta’ sigurtà fil-binjiet tagħna u madwarhom. Sabiex niżguraw żjara sikura għal kulħadd, nistednuk taqra u tikkonforma ma’ dawn il-miżuri:
- Huwa meħtieġ dokument tal-identità validu (karta tal-ID jew passaport) biex tidħol fil-binjiet tal-Parlament Ewropew. Jekk irreġistrajt minn qabel u pprovdejt id-dettalji tad-dokument tal-identità tiegħek, trid iġġib dan l-istess dokument lill-Parlament dakinhar taż-żjara tiegħek.
- Il-viżitaturi u l-basktijiet kollha jista’ jsirilhom kontrolli tas-sigurtà bħalma jsiru fl-ajruporti qabel ma jitħallew jidħlu. L-armi tan-nar, is-sustanzi splussivi jew fjammabbli, l-isprays tal-bżar, oġġetti li jaqtgħu u oġġetti oħra li jistgħu jitqiesu bħala armi huma pprojbiti. Skont il-leġiżlazzjoni nazzjonali, ċerti oġġetti pprojbiti jistgħu jingħataw lill-pulizija.
- L-ebda trolley, bagalja, jew bagalja kbira oħra mhuma permessi fil-binjiet.
- L-annimali huma permessi fil-bini biss bħala gwidi mħarrġa għall-persuni neqsin mid-dawl jew biex jassistu lill-persuni b’mobbiltà mnaqqsa.
- Jekk ikun inħareġ pass ta’ aċċess, il-viżitaturi jridu jilbsuh b’mod viżibbli waqt li jkunu fil-binjiet tal-Parlament.
- Ir-ritratti u l-iffilmjar huma permessi fiż-żona tal-viżitaturi, iżda huma pprojbiti fiż-żona tas-sigurtà u fil-gallerija tal-Emiċiklu waqt is-sessjonijiet plenarji u anki fir-ristoranti u l-barijiet. Għal aktar informazzjoni, jekk jogħġbok ikkonsulta r-Regoli li Jirregolaw ir-Reġistrazzjonijiet fil-Binjiet tal-Parlament Ewropew.
- Jekk jibda jdoqq l-allarm tan-nar, oħroġ mill-bini immedjatament mingħajr ma tiġri u segwi l-istruzzjonijiet mogħtija mill-persunal tas-sigurtà u l-voluntiera tal-evakwazzjoni.
- Għal kwalunkwe emerġenza tas-sikurezza, ċempel 85112 minn kwalunkwe telefown intern.
- Xi oqsma huma soġġetti għal sorveljanza bil-vidjo skont il-Politika ta’ Protezzjoni bil-Vidjos tal-Parlament Ewropew.
- Il-maskra tal-wiċċ mhix obbligatorja. Jekk jixtiequ, il-viżitaturi jistgħu jilbsuha.
- Jekk ma tkunx qed tħossok tajjeb, jekk jogħġbok ibqa’ d-dar u pposponi ż-żjara tiegħek. Nieħdu pjaċir nilqgħuk lura meta tħossok aħjar.
Aġġornata l-aħħar: 11/2023
