Info Hub  

Is féidir leat do thuairim agus do ghuth a chur in iúl sa Mhol Faisnéise. Inis dúinn an méid a bhfuil tú ag súil leis ón Aontas Eorpach agus an dóigh a gceapann tú gur féidir le Parlaimint na hEorpa beart a dhéanamh. 

Tá réimse leathan acmhainní agus gníomhaíochtaí idirghníomhacha spreagúla curtha ar fáil ag an Mol Faisnéise duit chun d’fhiosracht a spreagadh: rochtain oscailte ar ábhair taighde, eispéireas réaltachta fíorúla chun tú féin a thumadh in obair a bhíonn ar siúl ag Feisire, chomh maith le cainteanna, imeachtaí agus taispeántais. 

Le clár imeachtaí agus taispeántas atá ag athrú de shíor, is féidir leat teacht ar ais arís agus arís eile, agus eolas a chur ar rud éigin nua nó foghlaim faoi rud éigin eile go mion.
 

Tá réimse leathan gníomhaíochtaí ann chun taitneamh a bhaint as, rud a chuireann ar do chumas níos mó a fhoghlaim faoin dóigh a n-oibríonn Feisirí chun do shaol laethúil a fheabhsú. 

Áirítear leis seo cainteanna tráthúla le saineolaithe beartais a chuireann ar do chumas eolas agus léargais a fháil. Ar mhaith le do ghrúpa tuilleadh eolais a fháil ar shaincheist shonrach? Cuir in iúl dúinn agus is féidir linn seisiúin faisnéise saincheaptha a chur le chéile duit. 

Óstálann an Mol Faisnéise cruinnithe na sochaí sibhialta go rialta chomh maith agus is deis iontach iad chun do ghuth a chur in iúl.

Is féidir do léargas a leathnú trí pháirt a ghlacadh inár dtaispeáintí scannán, ár seoltaí leabhar agus ár dtaispeántais. 

Féach 'Cúinne na Leabharlainne' ina bhfuil rogha leabhar ar ábhair a bhaineann leis an Aontas Eorpach.

Breathnaigh ar chuid de Bhailiúchán Ealaíne Comhaimseartha Pharlaimint na hEorpa le linn do chuairte, tá dealbh Jens Galschiøt, Man on a Bench, ar taispeáint go buan ag an Mol Faisnéise

Is féidir leat do chuairt ar an Mol Faisnéise a chomóradh fiú; glac grianghraf sa bhoth grianghraf chun cuimhneachán ar do chuairt a choinneáil.
 

Idir cainteanna agus taispeáintí scannán, comhdhálacha preasa, cruinnithe na sochaí sibhialta, cuirtear imeachtaí nua leis an gclár i gcónaí. Déan cinnte súil a chaitheamh ar an gclár ag bun an leathanaigh, nó ar ardán imeachtaí an Mhoil Faisnéise chun teacht ar imeacht a bhfuil spéis agat ann.

Cuir ceist ar ár bhfoireann chairdiúil agus cabhróidh siad leat do bhealach a dhéanamh timpeall an Mhoil Faisnéise, nó timpeall ar champas Pharlaimint na hEorpa.

Tá an Mol Faisnéise inrochtana go hiomlán do chuairteoirí a bhfuil soghluaisteacht laghdaithe acu, tá fáil ar dhaoine den fhoireann chun cúnamh a thabhairt. Má theastaíonn cúnamh uait, téigh i dteagmháil leis an Mol Faisnéise roimh do chuairt.