Laethanta an Ilteangachais 2026  

Bí linn ag Laethanta Ilteangachais Pharlaimint na hEorpa an 13 agus an 14 Samhain 2026 chun teangacha agus a ról i ndaonlathas na hEorpa a cheiliúradh! I mbliana, beimid ag díriú ar dhearcthaí a leathnú.

Is deis iad Laethanta an Ilteangachais chun a fháil amach cad a tharlaíonn sa chúlra sa pharlaimint is ilteangaí ar domhan agus chun foghlaim faoin dóigh a n-oibríonn Parlaimint na hEorpa i 24 teanga. Buail lenár ngairmithe teanga – ateangairí, aistritheoirí, dlítheangeolaithe – chomh maith le saineolaithe cumarsáide agus baill foirne eile a oibríonn le teangacha. Foghlaim faoina gcuid oibre agus faigh amach faoin Seomra Tionóil aitheanta, ceanncheathrú Pharlaimint na hEorpa sa Bhruiséil.

Cinntíonn an t-ilteangachas, úsáid roinnt teangacha, gur féidir le gach duine san Aontas obair ár n-ionadaithe a thoghtar go díreach a leanúint in aon cheann de 24 theanga oifigiúla an Aontais. Tá an éagsúlacht teanga agus chultúrtha ar cheann de láidreachtaí an Aontais agus tá stádas uathúil ag na hEorpaigh ar an ardán domhanda dá bharr. Is deis iad Laethanta an Ilteangachais chun an éagsúlacht sin a fheiceáil faoi lán seoil.

Cuirtear clár éagsúil gníomhaíochtaí ar fáil san imeacht thar dhá lá. Dé hAoine an 13 Samhain, is féidir leat páirt a ghlacadh i gceardlanna ar líne, agus Dé Sathairn an 14 Samhain, cuirfimid fáilte romhat ar an láthair i bParlaimint na hEorpa sa Bhruiséil.

Faigh léargas níos fearr ar an ateangaireacht agus ar an aistriúchán ag na ceardlanna idirghníomhacha seo. Clúdaíonn na seisiúin ar líne gnéithe éagsúla den obair mar ghairmí teanga i bParlaimint na hEorpa agus is deis iontach iad chun freagraí a fháil ar do cheisteanna.

Tá na ceardlanna teoranta do ghrúpaí beaga, mar sin tá clárú éigeantach agus ar bhonn ‘tús freastail ar an gceann is túisce’. Nuair a bheidh tú cláraithe, gheobhaidh tú ríomhphost daingniúcháin ina mbeidh sonraí i dtaobh conas páirt a ghlacadh. Maireann na seisiúin idir 30 agus 90 nóiméad agus reáchtálfar iad i dteangacha éagsúla.

Foghlaim faoin ilteangachas trí ghníomhaíochtaí spraíúla i limistéar cuairteoirí PAUL-HENRI SPAAK i bParlaimint na hEorpa (lean na comharthaí ‘CUAIRTEANNA GRÚPA & SEOMRA TIONÓIL’) idir 10.00 agus 18.00 (iontráil dheireanach ag 17.00).

Ní mór duit clárú ag an mbealach isteach. Tabhair cárta aitheantais náisiúnta nó pas bailí leat (ní ghlactar le ceadúnais tiomána).

Tar chuig ár gcainteanna i dteangacha éagsúla chun níos mó a fhoghlaim faoi theangacha, faoin dóigh ar féidir dearcthaí a leathnú leo, agus faoin dóigh a n-oibríonn ateangaireacht agus aistriúchán i bParlaimint na hEorpa.

Seomra cruinnithe 0C.11

Ateangaireacht ar chainteanna go hOllainnis, go Béarla, go Fraincis, go Gearmáinis agus go hIodáilis.

Tá ár gceardlanna atá le teacht á dtabhairt chun críche agus foilseofar na sonraí uilig anseo go luath i mí Mheán Fómhair – coinnigh súil amach!

• Tabhair cuairt ar Sheomra Tionóil Pharlaimint na hEorpa (10.30-17.30, gach 30 nóiméad) – Féach thart ar an seomra ina mbíonn díospóireachtaí agus vótaí na Parlaiminte ar siúl. Cuir i láthair ilteangacha le ceisteanna agus freagraí.
• Tabhair cuairt ar bhoth ateangaireachta – Cuairt threoraithe ar cheann de na bothanna ateangaireachta sa Seomra Tionóil.
• Europarl Audio – Beimid ag craoladh beo ó Laethanta an Ilteangachais ar ár gcainéil meán sóisialta. Éist ó cibé áit ina bhfuil tú le haghaidh agallaimh ilteangacha le haistritheoirí, le hateangairí agus le rannpháirtithe; ceol Eorpach; agus léargais eisiacha ón imeacht!

• Bothanna ateangaireachta – Bain triail as ateangaireacht inár mbothanna cleachtaidh agus faigh aiseolas ó ateangaire!
• Aistriúchán faoi lán seoil – Ar smaoinigh tú riamh ar an dóigh a n-oibríonn an t-aistriúchán san Aontas Eorpach? Bain triail as tú féin! Bain trial as na huirlisí a úsáidtear sa Pharlaimint chun téacsanna, físeáin agus leasuithe a aistriú, agus féach an dóigh a dtacaíonn an teicneolaíocht leis an daonlathas ilteangach.
• Aistrímidne; taifeadann tusa! – Taifead téacs atá aistrithe againn duit in aon cheann de 24 theanga oifigiúla an Aontais agus bí do láithreoir podchraolta don lá! Ansin déantar an comhad fuaime a chur in eagar, a mheascadh agus a sheoladh chugat mar chlosghram is féidir a roinnt le cairde agus le gaolta nó ar do mheáin shóisialta.
• Buail le do ghairmithe teanga – An bhfuil tú fiosrach faoi sheirbhisí teanga na Parlaiminte agus faoi na gairmeacha teanga éagsúla? Buail isteach chun aithne a chur ar na saineolaithe agus cuir ceist orthu faoi gach rud is mian leat a fháil amach faoina gcuid oibre!
• Inrochtaineacht ilteangach – Faigh amach an dóigh a n-oibríonn seirbhísí cumarsáide agus aistriúcháin Pharlaimint na hEorpa le chéile chun eolas, feachtais agus gníomhaíochtaí rannpháirtíochta poiblí a dhéanamh inrochtana i ngach ceann de 24 theanga oifigiúla an Aontais, chun an t-ilteangachas a thabhairt níos gaire do na shaoránaigh.

• Luasfhoghlaim teanga – Buail isteach agus foghlaim cúpla focal sa Ghréigis agus sa Ghaeilge, teangacha Uachtaránacht an Aontais 2026, le mioncheachtanna spraíúla, praiticiúla. Níl aon taithí de dhíth, díreach fiosracht! Bunrang Gréigise 10.00-12.00 agus 14.00-16.00. Bunrang Gaeilge 12.00-14.00 agus 16.00-18.00.
• Cluichí teanga – Cluichí do leanaí agus do dhaoine fásta. Tar agus tástáil do scileanna teanga ar dhóigh spraíúil!
• Tatúnna sealadacha – Taispeáin do ghrá do theangacha le tatú sealadach.
• Balla grianghraf – Glac grianghraf agus seans go mbuafaidh tú duais!